كلمات الشاعر: مشاري بن إبراهيم المشاري البدراني (المجمعة)
أداء المنشد: حمُود عبدالله المقبل
ياسلامي على الدرع المتين … ذروة المجد مع كل اتجاه
كاسبين الثنا دنيا ودين … وفاالمراجل لهم وقفه وجاه
آل عمران يانسل الضمين … فيهم الجود عالي مستواه
طيبهم فوق طيب الطيبين … رحمة الله ياعودن بناه
آل عمران من ماض السنين … نور تاريخهم يبرق سناه
نسل عامر كعام المعتدين … ياكثر ماكتب عنه الرواه
ابن بدران والمجد المكين … تاج راس الزمن شيخ الدهاه
كل ماكاد عن غيره يلين … لاوصل له ويعلن له ولاه
يكرم الضيف بالكبش السمين … وخايف الناس ياسمله عصاه
ومن تعرض له السيف السنين … دام هو ماعطى الوسم انتباه
الدواسر حماة المحتمين … ومن وطى حدهم ياخذ جزاه
مركز العز خطلان اليدين … اسأل الشام وتجيب السراه
وجدنا مثل نجم الفرقدين … واصل العز بالعز وغذاه
جعل عمران فالجنه سكين … بن محمد وعامر مبتداه
زايدي ختم جده فاالجبين … ذروة المجد غاية مبتغاه
وسمنا يالرجال الواسمين … رسم عرقاه والمطرق قفاه
للوطن بالولا حصنن حصين … في يمينه متى ماهو بغاه
ودارنا دار ذربين اليمين … وادي سدير رابح من نصاه
عودة سدير دار الغانمين … درة الماس في عقد الفلاه
والاسم من عصور الاولين … سمي سدير من حامي حماه
ابن عامر سدير وذاكرين … باالتواريخ يعرف من قراه
اخوال الملوك الحاكمين … سادة الكون وكعام العصاه
منبع الدين والحق المبين … مقطع الحق فوجيه الطغاه
بالشريعه هداتن مهتدين … نقري الضيف ونقيم الصلاه
ياعسى الامن دايم كل حين … والعدو ربنا يقلع مداه
وصلوا عداد مانجمن يبين … وما طلع نجم ثاني في سماه
لمن بعث رحمه لكل العالمين … وآله وصحبه ومن يتبع هداه
